Kálfshamarsvík
![](http://chped.net/https/upload.wikimedia.org/wikipedia/commons/thumb/e/e5/K%C3%A1lfshamarsv%C3%ADk2010.jpg/220px-K%C3%A1lfshamarsv%C3%ADk2010.jpg)
![](http://chped.net/https/upload.wikimedia.org/wikipedia/commons/thumb/4/4e/Kalfhamarsvik%2C_Iceland_-_panoramio.jpg/220px-Kalfhamarsvik%2C_Iceland_-_panoramio.jpg)
Kálfshamarsvík er lítil vík norðarlega á vestanverðum Skaga. Þar var áður lítið þorp og nokkur útgerð en víkin er nú í eyði.
Fyrsta húsið í Kálfshamarsvík var reist rétt eftir aldamótin 1900. Á fyrstu áratugum 20. aldar og fram undir 1940 var mikil útgerð í Kálfshamarsvík og um 1930 var 151 maður heimilsfastur þar. Í þorpinu var samkomuhús og skóli og einhverjar smáverslanir. Fiskleysi og þjóðfélagsbreytingar á stríðsárunum urðu til þess að fólki fækkaði og síðustu íbúarnir fluttu burt veturinn 1947-1948. Fluttist útgerðin og fólkið aðallega til Skagastrandar.
Á Kálfshamarsnesi er viti sem upphaflega var reistur 1913 en endurbyggður 1939. Stuðlaberg setur svip sinn á umhverfið í Kálfshamarsvík.
Rétt norðan við Kálfshamarsvík er eyðibýlið Saurar, sem var mikið í fréttum snemma árs 1964 vegna draugagangs sem þar átti að vera en síðar þótti allt benda til þess að Sauraundrin ættu sér aðrar orsakir.